Nace Murabellos
Levo máis dun lustro pensando na posibilidade, e
traballando, aos poucos, na idea de editar algúns dos meus libros, e é agora
cando dou o paso, despois de ter pechado o proxecto que ocupou boa parte do meu
tempo nos últimos seis anos; falo dos poemas que escribín coa forma do haiku
(HAIKUGA), para un período de 100 anos, e que supera os 41.000 textos.
Os Murabellos / Pozas dos Murabellos |
Tiña claro, dende que comecei a pensar nunha editorial ou
nun selo no que acoller algúns dos meus libros, que cando iniciase ese camiño
da edición sería co nome de MURABELLOS. Escollín o nome que identifica un lugar
da miña aldea, Ludeiros, na parte baixa da serra de Santa Eufemia, na parroquia
de Manín. Nos Murabellos a veciñanza da nosa aldea construíu dúas pozas e un
pozanco ou pociño, para recoller a auga dos nacentes que alí abrollan, auga que
se xuntaba na poza do Porto do Carro, a onde tamén ía parar a auga das pozas da
Barreira, e dende alí era conducida ás veigas de Ludeiros. Ese lugar forma
parte da miña vida dende a infancia, cando ía cos meus avós a buscar a auga
para regar as leiras; e sempre me agradou o nome e o sitio e, coido que o
significado tamén é axeitado para esta iniciativa; xuntar versos para os poemas
e como xuntar auga para regar os alimentos, e ambos os dous nos alimentan.
Creo en min, si, claro que si!
Esta afirmación nace do traballo e do esforzo constante,
de sentarme cada día diante do papel en branco para conxugar os silencios dos
que nacen os versos, e dos versos os poemas cos que dicir algo. E si, claro que
si que creo en min, e por iso quero publicar os meus traballos, darlle
visibilidade, entregarchos para a súa lectura, e MURABELLOS é unha peza máis
nesa engrenaxe que o fai posíbel.
Detalle da portada de Murabellos |
O primeiro libro está na imprenta e non tardará en ver a luz.